كيف أقرأ كتب أكثر؟ طرقتي في تحقيق هدف القراءة السنوي و تجاوزه بمراحل

هذه السنة أعتبرها واحدة من أروع السنوات اللي مرت علي.. وواحد من الأسباب إني قدرت فيه أحقق كثير من أهدافي والأشياء اللي كان نفسي أسويها. وواحد من الأهداف اللي كنت كل مرة أحطها لنفسي لكن ما كنت أقدر أحققها – لين الآن – هي إني أقرأ 25 كتاب بالسنة ..

كيف أقرأ أكثر؟ نصائح عملية

ممكن عدد الكتب ما يكون كبير جدا للبعض، لكني متأكدة إنه كان بالنسبة لي – ولعدد منكم – شيء بعيد تحقيقه و ما نتخيل نشوف أنفسنا نسويه. عشان كدة حبيت أشارككم كيف قدرت إني أتجاوز هذا الرقم خلال نصف السنة و في طريقي إن شاء الله لمضاعفته بانتهاء عام 2016.

سواء كان هدفك تقرأي 25 أو 200 كتاب في السنة، اكيد إنك راح تلاقي أفكار و طرق تساعدك في تحقيق أهدافك.

  1. ضعي لنفسك هدفا محددا

طبعا هذا شيء واضح، خلي لنفسك هدف و رقم معين حدديه من بداية السنة و اعملي على تحقيقه. ببساطة معرفتك لهدفك راح يخليك تحاولي قد ما تقدري بأنك تعملي لتحقيقه أو تحقيق رقم قريب منه. و ابدئي برقم سهل تقدري تحققيه وبعدين كل مرة ارفعي الرقم و خلي نفسك في تحدي دائم.

2. ضعي قائمة بالكتب التي سوف تقرئينها لهذا العام 

حتى لو في البداية ما حطيتي كل الكتب مرة وحدة ، تحديد كتابين أو ثلاثة كل مرة راح يقلل من الوقت اللي تضيعيه في النص لاختيار ايش اللي راح تقرئيه بعدين ويصير أسهل عليك تشتري أكثر من كتاب بالمرة الوحدة بدل ما يكون صعب عليك كل شوي تنزلي المكتبة.

3. اقرئي بكل الطرق الممكنة 

وكل الأماكن كمان! عن نفسي اللي فرق جدا معي إني ايضا أدخلت الكتب المسموعة ضمن الكتب اللي حأقرأها وهذه اللي كانت كل الفرق بالنسبة لي. مع الأسف مافي كثير كتب عربي لكن من أمازون وعن طريق Audible.com تقدري تلاقي كتب كثيرة تستمعي لها. طبعا ميزتها أولا انها موجودة في جوالك تاخديها كل مكان مو زي الكتاب العادي. و بالنسبة لي أحب أسمع لها في كل وقت فاضي : أسمع وأنا في الطريق مع السواق، وانا انتظر في السيارة ، وانا أمشط شعري و أحط مكياج و أنا أشتغل بالبيت 🙂 شايفين، تخليني أستغل كل وقت في القراءة في نفس الوقت اللي أكون فيه أسوي شي ثاني بدل ما استمع للأغاني أو  أشياء ثانية.

وكمان الكتب الالكترونية تكون سهل تاخديها معك كل مكان و تستغلي مثلا في مول أو في السيارة إنك تقرأي. لكن مع الأسف لا توجد الكثير من الكتب الالكترونية ولا المسموعة في الوطن العربي.

 

3. اعملي حساب على Goodreads 

لو مستغربة كيف هذا الشي ممكن يساعدك أنا أقولك : أولا في قودريدز مو بس راح تشوفي ايش الكتب اللي نازلة جديد، لكن كمان تقدري تتابعي مدى قربك من هدف القراءة اللي إنت حاطاه، تشاركي مع صديقاتك فين وصلتي بالقراءة وتشوفي ايش الناس قاعدة تقرأ. هذا غير إنك تقدري تتابعي كاتبك المفضل و القروبات الخاصة بالقراءة. ببساطة لمن تصير شغلة القراءة مسلية أكثر راح تلاقي نفسك تواظبي عليها أكثر و أكثر. وهذا حسابي للاضافة ولو حابة تشوفي أنا ايش قاعدة أقرأ.

4. تابعي حسابات القراءة والكتب على انستغرام و سناب شات ويوتيوب

طبعا كل ما احطي نفسك بمجموعة محبة للقراءة وملهمة راح تلاقي نفسك في سباق مع الوقت عشان تقرأي أكبر عدد ممكن من الاصدارات الجميلة اللي صارت تطل علينا كل يوم من ابداعات الكتاب.

5. عيشي تجربة القراءة كاملة

عن طريق عمل ملخصات و أخذ اقتباسات من الكتب اللي تقريها. عن نفسي أحب أستخدم مطبوعاتي الخاصة ( وتقدري تحصلي عليها مجانا) لمتابعة الكتب اللي اقراها و اكتب كل الاقتباسات والمشاعر المصاحبة للكتاب، فأصبحت القراءة بالنسبة لي تجربة حياة أكثر من مجرد كتاب.. يعني كل ما تفاعلتي مع الكتاب أكثر وكان الموضوع اللي يتكلم عنه جذاب لك كل ما سهل عليك تقرأي أكثر.

6. وأخيرا.. العقاب البناء 

بالنسبة لي هذا واحد من الطرق الفعالة جدا .. و بالملخص إني أجبر نفسي على أني أكمل قراءة كل الكتب اللي اشتريتها قبل لا أسمح لنفسي إني أروح المكتبة ثاني و أشتري كتب ثاني ( وبالنسبة لي البعد عن المكتبة جنون) . جربيها وراح تفهمي قصدي .. و الطريقة فعالة جدا 🙂

 

الآن جا دورك، برأيك ايش الأشياء اللي تشوفيها ممكن تساعدك او تساعد البنات على انهم يقرؤوا أكثر ويا ترا ايش اهدافك للقراءة السنوية أو حتى لو الآن ما عندك ايش الهدف اللي راح تحطيه للسنة القادمة؟

ولا تنسي تشاركي هذا الموضوع من صديقاتك يمكن وحدة تستفيد..

ودمتم على أحلام محققة،

ندى

 

الأخطاء الشائعة التي تقع فيها #فتاة_البلانر وكيفية التغلب عليها

 

الأخطاء الستة التي تقع فيها فتاة البلانر وكيفكية تجنبها

بدأت التخطيط و التدوين من نهاية عام 2014، ومنذ ذاك الوقت للآن تعلمت أشياء كثير عنه. وفي نفس الوقت جاتني الفرصة إني أتعامل مع بنات كثيرات يحبوا البلانر و يعشقوه مثلي، وهذا شي يسعدني كثير. لكن مع الوقت بديت ألاحظ إن في فئة لا بأس بها منهم حاسة كأنها ( متربطة)، ماهي عارفة كيف تبدء، وايش تسوي و ايش الفكرة من الأساس .. واللي لاحظته كمان إن في أعذار تتكرر كثير عند أغلبهم .. وعشان كدة حبيت هذه المرة إني أشارككم أهم ستة أعذار سمعتها و وكيف تتغلبي عليها.

 

  1. ” ما عندي بلانر من أساس وماني عارفة كيف أشتري “

الحل: خليط بسيطة! حتى لو منت قادرة تجيبي ديك البلانر الكيوت اللي الكل يتكلم عنها، مازلت تقدري تشتري وحدة بسيطة من المكتبات المحلية و تبدئي فيها إلين ما تتعودي على الموضوع. والحقيقة إني ما اعتقد إن العالم صار مقفل قد كدة. بمعنى، لو من جد حابتها …اشتريها …. ايوه خلاص انا قلتها .. اشتريها يا أمي و خلاص !…. دايما أنا استغرب قديش احنا البنات ممكن نروح نصرف في خرجة وحدة أو عشوة في مطعم أكثر من سعر بلانر ممكن يقعد معنا سنة كاملة ( وممكن أكثر لو كنت تستخدمي أبو نظام الحلقات) واللي من شأنه إنه يساعدنا في تنفيذ مهامنا وتطوير ذاتنا، وهذا برأي بشيء صراحة لا يقييم . تقدري تطلبي بنفسك أو تخلي صديقتك تطلب لك. و لو حابة مساعدة شوفي التدوينة حقتي عن كيفية الشراء من موقع كيكيكاي . وكمان تقدري تحصلي على مطبوعاتك الخاصة مجانا من مكتبة كبار الشخصيات المليئة بالملفات المفيدة من تصميمي.

 

  1. ” طيب، مني قادرة أزين البلانر و أخلي شكله يصير كيوت زي حق صور البنات في انستغرام .. اصلا مني مقتنعة باللي يسووه .. لازم يعني أسوي كدا؟”

لا طبعا ، مو لازم ! .. لازم بس انك تسوي شي واحد : اللي إنت مقتنعة بيه ! .. يببدوا لك شيء منطقي لكن راح تستغربي من كمية البنات اللي فعلا الموضوع مربطهم ومنتغص عليهم حياتهم .. شوفي ، لو الموضوع قد كدة مقلق لك ، حاولي تعملي شي خفيف و اعتمدي على الأدوات والاشياء المتوفرة حوليك. بنفس الوقت أحب أدعوك لانك تتعرفي على مجموعة الستكرز الخاصة بالبلانر من تصميم محسبوتكم واللي أنا عاملتها بس عشان هذه النقطه بالذات: التزيين الأنيق والعملي للبلانر. تقدري تتطلعي عليها وتطلبيها عن طريق حسابي في انستغرام @nadabrabie .

 

  1. ” مني عارفة من فين أبدء”

الحل سهل. أنصحك: ابدئي بالتخطيط الأسبوعي، وخلي الشهري والسنوي الآن. لكل اسبوع اكتبي الأشياء المهمة. وخليك عالأشياء السهلة. مثلا: عندك عزومة الثلاثاء، اكتبيها. عندك موعد أسنان السبت، اكتبيه. وكذا لين ما تاخدي على الموضوع. والصباح تعالي لكل يوم وحددي ثلاثة أشياء مهمة تبي تسويها لهذا اليوم وأكتبيها كقائمة مهام. وبالتدريج صيري سوي القائمة يوم قبل وكدا لين ما تتعودي تسوي الأسبوع من قبل. وعلى فكرة على مدونتي مجموعة من المواضيع اللي تساعدك عشان تبدئي. مثلا، شوفي عدة المبتدئ للتخطيط، تهيئة البلانر و خططي معي أول أسبوع في أغسطس. و حتى تكلمت على مواضيع من الصفر مثلا ايش هي البلانر؟ ايش فائدتها؟ وكيف تختاري البلانر الخاص بك. أتمنى إنك تجدي فيها الإلهام.

 

  1. ” ما حأستمر = خلاص ما ابغى أبدء “

خطأ خطأ خطأ ! ما لا يؤخذ كله لا يترك كله، متفقين؟ التأجيل عادة سيئة جدا و انا أشجعك إنك تتغلبي عليها بدل ما بالعكس تعززيها. يعني: بدل ما تقولي ما حأستمر يصير خلاص، فكري : طيب كيف أستمر وكيف أخليه عادة؟ .. حددي لنفسك مثلا كل صباح إنك مع قهوتك تمسكي البلانر و تشوفي ايش عندك وتكتبي ايش لازم تسوي. عن نفسي أهم شي أسويه عشان استمر هو إني أزين البلانر حقي . يعني كل ما حبيت شكلها أكثر كل ما كان احتمال إني أرجع لها أكثر . وكل ما كانت البلانر عاجبتني وداخلة مزاجي كل ما استمريت في الكتابة والتدوين لفترة اطول.

  1. ” يالله! فجأة طلعتلي شغلات إضافية و لسة باقي خمسة أشياء على قائمة المهام”

باختصار: الحياة تحدث! كوني مرنة ! ممكن تجي أشياء ما هي في الحسبان و ممكن اليوم كله ما يمديك تسوي شي. لكن هذا مو معناه إنك تعاقبي نفسك وتخلي هذا الشي يحبطك. طبعا هذه الشخصية عكس اللي تكلمنا عنها فوق. لكن الاثنين بيأدوا لنتيجة عكسية. خلي متسع في قائمتك للاشياء الطارئة و كوني عارفة إنك ممكن تنقلي قائمة المهام لليوم اللي بعده أو حتى الأسبوع اللي بعده إذا لزم الأمر. السر هو الاستمرار والمثابرة مع المرونة اللازمة . افتكري هذه العبارة.

 

  1. ” اليوم قرب يخلص و لسة ما خلصت حتى نصف الاشياء اللي كنت مقررة أسويها”

لا تبالغي لمن تكتبي قائمة المهام! خليك واقعية واعرفي ايش امكانياتك وامكانيات يومك وظروف اسرتك . وترا عادي ، اكثر الناس يبالغوا بقديش ممكن يحققوا في اليوم الواحد ، لكنهم يقللوا من قيمة ما يستطيعون أن يحققوه في الشهر أو السنة مع الاصرار والمثابرة. خلي عندك قائمة بسيطة تقدري فعلا إنك تسويها. لأن خلينا واقعيين، لو فضلت أكثر الأشياء ما تتسوى هذا الشي راح يضايقك ويمكن ما يشجعك.

 

أتمنى تكون الفكرة وضحت وتكونوا استفدتوا و أكون ساعدتكم تحطوا ايدكم على الأخطاء، والأهم، تحاولوا علاجها. أقدر أقول إن بالأغلب حتلاقي عندك كل أو معظم الصفات.. وخليني أقللك سر : انا عندي كلهم !!!! .. اي قريتي صح ! .. كلهم ومزيج منهم و لكن كل يوم كنت أعدل و أتغلب عليهم لين ما صار التخطيط جزء أساسي في حياتي .. فإذا أنا قدرت، اكيد إنت كمان تقدري .. افتكري مرة ثانية: الحل في الاستمرار و المثابرة مع المرونة!

 

و يا رب أشوفكم كلكم مخططات ناجحات.

 

لا تنسوا تشاركوني أراءكم وتقولوا لي ايش اللي حسيتوه ينطبق عليكم أو مثلا لاحظتوه بكثرة في البنات اللي حوليكم و ايش اللي سويتوه عشان تتغلبوا على الموضوع. وهل برايك في اشياء أخرى تستحق الذكر أو حابة تأكدي عليها ما ذكرتها أنا فوق .

 

لا تنسي كمان تشاركي هذه التدوينة على فيسبوك أو تويتير أو وسائل التواصل الاجتماعي المفضلة عندك وخلينا نحاول سوا إننا نساعد أكبر عدد من البنات على إنهم كتسبوا هذه العادة الايجابية واللي هي عادة التدوين.

 

ودمتم على أحلام محققة،

 

ندى

 

 

طريقة تقسيم و تزين البلانر الخاص بك وتهيئته للاستخدام – شرح بالفيديو

السلام عليكم بنات ..

تقسيم و تزين البلانر وكيف اعمل فواصل وايش هي الأقسام

حابة اليوم أشارككم تفاصيل التفاصيل في كيف اني هيأت البلانر حقي للاستخدام وكيف عملت له فواصل و تسميات و خليته جاهز للاستخدام الفوري وصار شكله حلو و عملي كمان .. استخدمت الأدوات اللي جاتني في صندوق جمعية البلانر الأمريكية حقت شهر يونيو و وريتكم كيف تقدري تعدلي على الاشياء و تعملي منها حاجات حلوة كثير ..

تعالي نشوف الفيديو ..

أتمنى يكون الموضوع عجبكم واستفدتم منه .. لا تنسوا انكم تسيبوا تعليقاتكم في الأسفل و اي تساؤلات عندكم أو استفسارات ..

وكمان لا لاتنسوا تشاركوا التدوينة هذه مع صديقتاتكم على فيسبوك وتوتير وغيره من وسائل التواصل الاجتماعي المفضلة عندك ، يمكن وحدة من جد تستفيد من هذا الموضوع و تكون شاكرة لك على المشاركة ..

ودمتم على أحلام محققة ،

ندى

#خططي_معي: طريقتي في تخطيط الأسبوع و تزينه وماالأشياء التي تكتب في التخطيط كل يوم.. إجابة سؤال: كيف أبدء أخطط

من أكثير الأسئلة اللي تجيني: أنا مرة حايسة و مني عارفة كيف أبدء باستخدام البلانر حقي، ممكن تساعديني ؟ يعني مني عارفة ايش أكتب في كل يوم ؟ ايش اكتب في كل أسبوع ؟ ايش الأشياء الأساسية وكيف ممكن انها تساعدني ؟ 

خططي معي: طريقة الزين الأسبوعي للبلانر

ولا يهمك .. أولا بحب أقولك إن عادي جدا في البداية ما تكوني عارفة من وين تبدئي، وراح تاخدي وقت وتجربة عشان تصقلي مهارتك هذه و تعرفي ايش اللي تحتاجيه وايش لا .. و تحددي ايش هي أولوياتك خلال اليوم .. و صراحة أنا ما ألومكم لأن شايفة كثير من فيديوهات التخطيط والتزين بالإنجليزي ، لكن العربي قليل جدا ..

عشان كدة حبيت أوصل لكم الرسالة بأسهل طريقة ممكنة وهي عن طريق إني أبدء سلسلة من الفيديوهات و التدوينات و استخدم فيها هاشتاق #خططي_معي  و #خططي_مع_ندى واللي فيها كل مرة حعلمكم بعض الحيل و الطرق اللي نزين فيها البلانر وايش الأشياء اللي تنكتب في كل يوم .. طبعا كل ما شفتي أفكار أكثر كل  ما تعلمتي أكثر ، عشان كدا أنا بديت الهاشتاق هذا عأساس كلنا نقدر نلهم بعض و نعلم بعض ونتشارك أعمال بعض .. وابغاك إنت كمان تسوي نفس الشي بدورك وتشاركيني اللي سويتيه و تشاركي غيرك .. لأن التواصل والدعم هو من أهم الصفات اللي تميز مجتمع البلانر عن غيره من الهوايات و المجتمعات …

خليني أسيبكم مع الفيديو اللي سويته بكل حب لكم .. واللي فيه خبر جدا جميل وبشرى سارة لكل البنات اللي حابين يبدؤا رحلة التخطيط لكنهم شايفين إن الموارد اللازمة قليلة في العالم العربي

 

أتمنى يكون الفيديو عجبكم وتكونوا استفدتوا منه.. لا تخرجي من غير ما تشاركينا رأيك و طريقتك في خانة التعليقات بالأسفل أو إذا كانت هذه أول تجربة لك قولي لي ايش أكثر شي استفدتيه من الفيديو و ايش الطرق اللي عجبتك فيه ؟

وكمان لا تنسي إنك تشاركي هذا البوست و الفيديو مع صديقاتك على فيسبوك وتوتير وغيره من وسائل التواصل الاجتماعي المفضلة عندك و خلينا كلنا نفيد ونستفيد ..

ودمتم على أحلام محققة،

ندى

Planner Setup: actionable step-by-step guide||إعدادات البلانر: خطة تنفيذ عملية خطوة بخطوة

filofax planner setup decoration

Continue reading “Planner Setup: actionable step-by-step guide||إعدادات البلانر: خطة تنفيذ عملية خطوة بخطوة”

Ramadan Free Printable Planner Stickers||ستكرز شهر رمضان للبلانر جاهزة للتحميل والطباعة مجانا

Free Ramadan Printable Planner Stickers Erin-Condren size appropriate

Continue reading “Ramadan Free Printable Planner Stickers||ستكرز شهر رمضان للبلانر جاهزة للتحميل والطباعة مجانا”

Insights into Ayah: Free Planner Printable Quran Study||وقفة مع أية: مطبوعات بلانر مجانية للدراسة والتأمل

مطبوعات بلانر مجانية للدراسة والتامل في يات الله عز وجل والقرآن الكريم

Continue reading “Insights into Ayah: Free Planner Printable Quran Study||وقفة مع أية: مطبوعات بلانر مجانية للدراسة والتأمل”

Holy Quran Reading Free Planner Insert Printable||منظم ختم القرآن في شهر رمضان مجانا

Continue reading “Holy Quran Reading Free Planner Insert Printable||منظم ختم القرآن في شهر رمضان مجانا”